ലോക്ഡൗണ്‍ ദിനങ്ങള്‍ ക്രിയാത്മമാക്കുന്നതിന്റെ ഭാഗമായി 1983-യുടെ നിര്‍മാതാവും ക്വീന്‍-ന്റെ സഹനിര്‍മാതാവുമായ ടി ആര്‍ ഷംസുദീന്‍ പ്രൊമോട്ടറായ ഡ്രീംകാച്ചര്‍ കഴിഞ്ഞയാഴ്ച സംഘടിപ്പിച്ച ഓണ്‍ലൈന്‍ സിനിമാ പഠന സെഷനില്‍ പങ്കെടുത്തവരില്‍ നിന്ന് ഫീസായി ലഭിച്ച മുഴുവന്‍ തുകയും മുഖ്യമന്ത്രിയുടെ ദുരിതാശ്വാസനിധിയിലേയ്ക്ക് കൈമാറി.

വിഷുദിനത്തില്‍ ഉച്ചയ്ക്ക് മുന്നൂ മണിക്ക് തിരക്കഥാകൃത്തുക്കളായ ബോബി സഞ്ജയ്, സംവിധായകന്‍ മനു അശോകന്‍ എന്നിവര്‍ നയിച്ച ക്ലാസുകളില്‍ 103 പേരാണ് പങ്കെടുത്തത്. ഇവര്‍ക്കു പുറമെ ടീമഗംങ്ങളായ 4 പേരും ഫീസായ 300 രൂപ വീതം നല്‍കിയതുള്‍പ്പെടെയാണ് 32,100 രൂപ ദുരിതാശ്വാസനിധിയിലേയ്ക്ക് കൈമാറിയത്.

വരുന്ന ബുധനാഴ്ച (ഏപ്രില്‍ 22) നടക്കുന്ന അടുത്ത സെഷനില്‍ ടേക് ഓഫ്, നിര്‍മാണം പുരോഗമിക്കുന്ന മാലിക് എന്നിവയുടെ സംവിധായകനും പ്രശസ്ത എഡിറ്ററുമായ മഹേഷ് നാരായണന്‍ എന്നിവര്‍ സംവിധാനം, എഡിറ്റിംഗ്, സിനിമാട്ടൊഗ്രഫി എ്ന്നീ വിഷയങ്ങളില്‍ ക്ലാസെടുക്കുകയും പങ്കെടുക്കുന്നവരുടെ ചോദ്യങ്ങള്‍ക്ക് മറുപടി പറയുകയും ചെയ്യും. ഉച്ചയ്ക്ക് 3 മണിക്കാണ് 90 മിനിറ്റ് ദൈര്‍ഘ്യമുള്ള പരിപാടി ആരംഭിക്കുക.

പങ്കെടുക്കുന്നവരില്‍ നിന്ന് ഫീസിനത്തില്‍ 300 രൂപ വീതം ഈടാക്കുന്നതിലൂടെ ലഭിക്കുന്ന തുക മുഴുവനും പിറ്റേന്നു തന്നെ മുഖ്യമന്ത്രിയുടെ ദുരിതാശ്വാസനിധിയിലേയ്ക്ക് നല്‍കുമെന്ന് ഡ്രീംകാച്ചറിന്റെ വാര്‍ത്താക്കുറിപ്പില്‍ പറഞ്ഞു. ആദ്യം രജിസ്റ്റര്‍ ചെയ്യുന്ന 100 പേര്‍ക്ക മാത്രമായിരിക്കും പ്രവേശനം ലഭിക്കുക. വിവരങ്ങള്‍ക്ക് 80865 38111.

തമിഴ് സൂപ്പര്‍ താരം വിജയുടെ പുതിയ ചിത്രമായ മാസ്റ്ററിന്റെ ഓഡിയോ ലോഞ്ചില്‍ കുറിക്ക് കൊള്ളുന്ന ഡയലോഗുകളുമായി താരം. ആദായനികുതി വകുപ്പിന്റെ റെയ്ഡിന് ശേഷം നടന്ന പൊതുപരിപാടിയെന്ന നിലയില്‍ ഓഡിയോ ലോഞ്ച് ശ്രദ്ധ പിടിച്ചുപറ്റിയിരുന്നു. വിജയുടെ വീട്ടിലും ഓഫീസുകളിലും നടന്ന റെയ്ഡില്‍ ഒന്നും കണ്ടെത്തിയിരുന്നില്ല. താരം നികുതികാര്യത്തില്‍ വളരെ പെര്‍ഫക്റ്റാണെന്ന് പറഞ്ഞ് ഒടുവില്‍ ആദായനികുതി വകുപ്പ് ക്ലീന്‍ ചിറ്റ് നല്‍കുകയും ചെയ്തു.

റെയ്ഡുകളില്ലാത്ത ആ പഴയ ജീവിതം എനിക്ക് വേണം. സമാധാനപരമായിരുന്നു അത്-ഇങ്ങനെയായിരുന്നു ഓഡിയോ ലോഞ്ചില്‍ താരത്തിന്റെ പ്രതികരണം. നിയമങ്ങള്‍ നടപ്പാക്കുന്നത് ജനങ്ങള്‍ക്ക് വേണ്ടിയാകണമെന്നും ആരുടെയും വ്യക്തിതാല്‍പ്പര്യങ്ങള്‍ക്ക് വേണ്ടിയാകരുതെന്നും വിജയ് പറഞ്ഞു.

തന്റെ സുഹൃത്ത് അജിത്തിനെ പോലെയാണ് താന്‍ ഡ്രസ് ചെയ്തിരിക്കുന്നതെന്ന് വിജയ് പറഞ്ഞു. കറുത്ത ഡ്രസ് ധരിച്ചായിരുന്നു വിജയ് ചടങ്ങിനെത്തിയത്. ലോകേഷ് കനകരാജ് സംവിധാനം ചെയ്യുന്ന മാസ്റ്ററിനു വേണ്ടി ആവേശത്തോടെയാണ് ആരാധകര്‍ കാത്തിരിക്കുന്നത്. വിജയ് സേതുപതിയും ചിത്രത്തില്‍ പ്രധാന വേഷം ചെയ്യുന്നുണ്ട്.

പ്രതിഫലത്തിന്റെ കാര്യത്തില്‍ തമിഴ് സൂപ്പര്‍ താരം വിജയ് നടത്തുന്നത് വമ്പന്‍ കുതിപ്പ്. ആദായനികുതിവകുപ്പ് താരത്തിന്റെ വീട്ടില്‍ നടത്തിയ റെയ്ഡ് തമിഴ്‌നാട്ടില്‍ വലിയ കോളിളക്കം സൃഷ്ടിച്ചിരുന്നു. അതെല്ലാം ഒതുങ്ങി കഴിഞ്ഞ ദിവസമാണ് വിജയ് വളരെ കൃത്യമായി നികുതി അടച്ചിട്ടുണ്ടെന്ന് ആദായ നികുതി വകുപ്പ് വ്യക്തമാക്കിയത്.

ഇതിന് പിന്നാലെയാണ് പ്രമുഖ നടി ഖുശ്ബു വിജയുടെ പ്രതിഫലകണക്കുകള്‍ പുറത്തുവിട്ടിരിക്കുന്നത്. 2019ല്‍ പുറത്തിറങ്ങിയ സ്‌പോര്‍ട്‌സ് ആക്ഷന്‍ ചിത്രമായ ബിഗിലിന് വേണ്ടി വിജയ് വാങ്ങിച്ച പ്രതിഫലം 50 കോടി രൂപയാണത്രെ. അറ്റ്‌ലീ കുമാര്‍ ആയിരുന്നു ചിത്രത്തിന്റെ കഥയും സംവിധാനവും. തിയറ്ററുകളില്‍ വമ്പന്‍ പ്രതികരണമായിരുന്നു ബിഗിലിന് ലഭിച്ചത്.

ലോകേഷ് കനകരാജ് ഒരുക്കുന്ന അടുത്ത വിജയ് ചിത്രമാണ് മാസ്റ്റര്‍. ഇതിന്റെ ഷൂട്ടിംഗിന് നടുവിലായിരുന്നു താരത്തെ ഇന്‍കം ടാക്‌സ് ഉദ്യോഗസ്ഥര്‍ കസ്റ്റഡിയിലെടുത്തത്. മാസ്റ്ററിന് വേണ്ടി 80 കോടി രൂപ പ്രതിഫലമാണ് വിജയ് വാങ്ങിയതെന്ന് ഖുശ്ബു പറയുന്നു. എന്നാല്‍ ഇതിനെല്ലാം കൃത്യമായി താരം നികുതി അടയ്ക്കുന്നുണ്ടെന്നും അവര്‍ വ്യക്തമാക്കി.

വിജയ് സേതുപതിയും വിജയ്‌നോടൊപ്പം ഒന്നിക്കുന്ന ചിത്രമാണ് മാസ്റ്റര്‍.